Kartida waa loo Dhashaa, Kaskana weynahaa baxsha, kalsoonidu waa hogaan
Kaynaan baa Calankii sida,

Aduunka umadaha ku nool qolo weliba waxbay caan ku tahay oo lagu amaanaa
Ama lagu dhaleeceeyaa ,

waxaa nasiib daro noqoto warbaahinta caalamka iyo dhamaan qaybaha kala duwan ee bulshada caalamka in soomaalidu ka noqotay Tuke baal cad oo wax xun maahine aan wax wanaagsan laga qorin mararka laga hadlayo dadka dhagaysanaayaa iyo kuwa fiirsanayaa way dhibsadaan waxa laga sheegayo.

Hadana waxaan marqaati ka nahay dadka waxaas samaynayaa inay yihiin 5% oo 95 % ay ka badqabaan dhinaca taageerada niyada iyo lakala safashada maahee ficil xun waxaa samaynayaa
Waa wax yar.

Qormadaydan oo aan ugu talo galay inaan ku falanqeeyo kaalinta uu maanta taaganyahay wiilka soomaaliyeed ee la ahna Fanaanka dhalinyarada ah ee
Kaynaan ayaa waxaan tusayaa bulshada soomaaliyeed marka hore in qof walba gaar ahaantiisa xil ka saaran yahay kor u qaadista magaca iyo muuqa iyo muunada umada soomaaliyeed.

Xalay ayaa waxaa warbaahinta iyo telefishinada caalamka laga soo daayay bandhig faneed
Ay ka soo qayb galayaasha koobka aduunka ku soo bandhigayeen fanaaniintoodu heeso
Iyo muuqaalka jiritaanka wadankooda iyaga iyo shacabkooduba.

Hadaba kaynaan oo ka mid ahaa faaniinta meeshaas ka soo qayb galay ayaa waxa arin lagu daydo
Oo lagu baraarugo ah inuu soo qaatay Calanka umada soomaaliyeed , xitaa durbaanada loo garaacayay
Uu ku shaqlay calanka umada soomaaliyeed isaguna uu gacanta ku hayay calankiisa isaga oo ku dhaadana .

(Sareeyoow ma nusqaamoow
Aan siduu yahay eegnee
Kana siib kana saar)

(Qolaba calankeedu waa cayn
Inaga keenu waa cirkoo kale
Aan caadla lahayne caashaqay)

(Calankayagoow hooyaa
Waad na caawisee )

Waa suugaantii abwaanadii hore ee wadaniyiinta ah ee dhaxalka ahayd ee uu nooga tageen waxaana ka dareemaysaa qiimaaha iyo wanaaga iyo muhiimada uu leeyahay calanku ama sumada umad lagu gartaa oo ka turjumaysaa waxaad tahay , hadaad dhulka dhigtona inaad dhulka taalo sida aan maanta nahay hadaad kor u qaadona inaad kor ahaanayso.

Manta waxaan dhamaanteen kor u sidnaa calanka qabiilka iyo jufada , raaska, bahda, qoyska,
Ma jiro qof soomaliyeed oo subixii u toosa siduu wadankiisaa soomaaliya iyo umadiisa soomaaliya wax ugu qaban lahaa isaga oo aysan ku jirin ujeedo gaar ah ama dan isaga iyo reerkiisa ka badan.
Waxaynu wada nahay , jago doon , macaash doon, xoolo doon, magac doo, maksab doon, madax doon, godob doon, aar doon, iwm
Ma jiro qaran doon, wadan doon , calan doon, cisi doon, iwm

Waxaan umada soomaaliyeed ku boorinayaa inay ubadkoodaa ku barbaariyaan diinta islaamka iyo wadaniyada, halkay ku bilaabayaan , (yaa tahay ),( qolamaa tahay) inay ugu bedelaan inuu yahay soomaali qofka soomaaliyeedna yahay walalkiis si loo helo berito kumanaan leh qadiyada
Mudane kaynaan warsame oo kale.

Waxaan dareemay yididiilo markaan arkay calankii umada soomaaliyeed oo caalamka oo dhan hor yaala iyo wiil soomaaliyeed oo kor u sida , waxaan ogaaday inaysan dhamaan rajadii wadankani
Ee uu baahaan yahay 15% wadaniyiina oo naftooda iyo maalkooda dib ugu yagleela wadankii soomaaliya waxaan dhalinyarada soomaaliyeed kula talinayaa in nin walba xil ka saaran yahay
Wax u qabashada umadiisaa iyo wadankiisa waxaan hadalkayga ku soo afjarayaa tixdan gaaban.

Kolkay badaha u baqooshay
Kolay kala baaday badiba
Kolkay kurbadiyo xanuunka
Kadeedka badeen dadkeedu
Kacdoonkiyo dhiiladiisa
Kolkay saxariir ka qaaday
Kolkay kallahaada badisay
Kolkay kooraha dul saartay
Ee ay keenaysay awrka
Kolkay kala guurtay badiba
Kolkay geediga bilowday
Kolkay kanadiyo maraykan
Kolkay yurub kooxi gaadhay

Kunbaa dhaqankooda diiday
Kunbaa diintii kahdoodoo
Kunbaa kasi waayay talada
Kooxiba meelbay u baydhay

Kartida waa loo dhashaa
Kaskana waynahaa baxsha
Kalsoonidu waa hogaan
Kaynaanbaa calankii sida
Keligiis buu taagan yahay
Kulan ay kuman malyuun
Ku loolamayaan dadoow
Waxuu kor u qaadayaa
Kor dahab calankii ahaa
Kuwii garabkiisa iyo
Kaltanka la wadaagi laa
Iyagaa iss kadeedadayooo
Kurkay iska gooynayaan
Kaaray isku weeraaraan
Koox koox bay kala noqdeen
Kursi bay wada doonayaan
Kaskeedana ruux lehiba
Kuligood kuma wada jiroo
Kuus lacagay wada rabaan

Allow kaynaano badan
Kun wiilo magaca sida
Kitaabada kuwa qoriyo
Kubada kuwa dheela iyo
Kuwo orodyahanahiyo
Kuwa hindisiinahoo
Aduunka kusoo kordhiya
Waxay keeneen iyagu
Kor yeelana magaca iyo
Kaalinteenii dadnimo

Kuwaan laga maarmi karin
Kartiyo diin iyo aqoon
Wadani kaafiya dadkaan
Kariimoow adigu keen.


Waa Qalinkii iyo Hal-abuurkii
Cabdiraxiin Hilowle Galayr
This e-mail address is being protected from spambots. You need JavaScript enabled to view it

Source: dhacdo.com

Lajiide.com

Email: This e-mail address is being protected from spambots. You need JavaScript enabled to view it